11.11.14

Juventude uluk nian, sira mai ho sira nia natureza no situasaun ida ketak. Sira iha espiritu solidariedade bo’ot tebes. Sira iha espiritu amizade hodi uza sira nia enerjia no sira nia matenek ne’ebe mak iha, hakarak luta ba libertasaun patria no povu rai ida ne’e. Juventude ohin loron sai  hanesan forsa atu halakan ahi espiritu nasionalizmu ba iha rai ida ne’e no sai xave hodi hatutan sofrimentu ne’e ba iha dezenvolvimentu ne’ebé maka ita hotu hakarak.

 

Se juventude iha tempu difisil fó ona nia espiritu no nia sakrifisiu tomak hodi liberta rai maibé juventude sira agora lakohi sai forsa ida hanesan uluk entaun ita nia nasaun atu sai saida. Se juventude agora no juventude pasadu la kria ezemplu diak ba jerasaun foun sira maka ita atu uza saida para atu kontrola ita nia rai doben ida ne’e,” dehan Vise Prezidenti Komisaun 12 de Novembro no Prezidenti Komisaun Organizadora Rogerio da Cruz iha nia knaar fatin iha Eis Komarka Balide Dili (CAVR], Tersa (04/11/2014).

 

Nia dehan, diferensia forsa juventude iha pasadu katak nia bele lakon buat hotu-hotu no forsa ne’e la’os dehan katak atu uza forsa hodi baku malu, laos odiu malu, tenki trai malu, forsa ne’e ita hatudu para atu uza ba ema komum la’os ba nia an de’it. Forsa ida uluk uza hodi tau ideia hamutuk no hamutuk hodi luta ba libertasaun no forsa agora hamutuk hodi dezenvolve rai ida ne’e.

 

Hanesan tinan-tinan ita selebra loron nasional ba juventude atu husu nafatin ba joven sira nomos ba intelektual joven sira tanba joven barak entaun ita iha kamada populasaun Timor tuir dadus estatistiku 2010 nomos estatistika ne’ebe mak ita hetan katak ita nia total populasaun ho idade 12-35 hetan persentazen bo’ot.

 

Prezidente Consellu Nasionál Juventude Timor-Leste, CNJTL, Leovogildo Hornai hatete tinan-tinan ita selebra loron nasionál ba juventude, joven Timor hotu-hotu halo reflesaun ida ba momentu sira ne’ebé mak importante para atu bolu atensaun ema hotu hodi harii no  haboot nafatin espiritu patriotizmu, espiritu nasionalizmu, espiritu solidariedade, espiritu vontade servisu hodi defende soberania.

 

Importansia ba tema iha tinan ida ne’e, nia hatutan, oinsa ita bolu atensaun katak joven sira iha pasadu hanesan iha tinan 1975 ne’ebé mate iha momentu ne’eba no mós sira ne’ebé maka sei moris sira hotu-hotu halo buat bo’ot ba rai ida ne’e. Sira oferese konseitu ba estadu ida no konseitu ba nasaun ida kona-ba libertasaun da patria hanesan joven sira iha tinan 1991 no iha 28 de Outubro ne’ebé mak Sebastião Gomes fó nia-án no vida tomak hodi hatete ba mundu katak ha’u mate atu liberta povu no rai ida ne’e.

 

“Ita hotu-hotu hakarak halo reafirmasaun no husu ba joven hotu ne’ebé maka goja independensia ne’e liu-liu jovens ne’ebé maka foin tama iha idade 19 ou 20 atu hatene didiak esensi hosi selebrasaun ne’e.  Husu ita hotu atu halibur ideias no forsa hamutuk  atu koalia ba interese nasionál liu-liu joven sira tenki uza oportunidade diak atu goja independensia ne’e ho investe-án ba iha edukasaun katak “ Eskola no eskola, estuda no estuda labele forma uma kain sedu,” nia dehan.

 

Nia hatutan, jovem agora tenki prepara iha setor hotu-hotu hodi kompete no sai joven ne’ebé maka prontu iha termu kualidade maibé la’os kuantidade. Joven sira hotu, tuir nia,  tenke moris tuir kultura Timor nian no nu’udar identidade Timor oan katak jovens ne’ebé tene ás ba valor kultural katak respeita malu, konsidera malu, no hanai malu.


Jovem maka sai xave, nia dehan, tanba Timor mai ho tradisaun hodi servi, badinas serviau, no Timor tenki mai ho jovem ida badinas buka osan, badinas estuda, hamosu inovasaun no kreatividade, halo kritika hodi partisipa iha prosesu dezemvolvimentu nasionál. Tanba ne’e, nia husu ba joven hotu-hotu hametin unidade nasional, kaer nafatin espiritu solidariedade no espiritu badaen matenek nian para bele priense dezenvolvimentu ne’ebé maka iha.

 

Entretantu, Sekretariu Estadu Juventude no Desportu (SEJD) Miguel Manetelu hatete, jovem sira agora bele koloka sira nia-án hanesan Timor oan ne’ebé maka iha responsabilidade no sira tenki orgullu hanesan timoroan tanba independensia ne’e ema sosa ho ran, kosar been, matan been no mós sakrifisiu oin-oin.

 

Ho ida ne’e, nia dehan, hanesan lider rezistensia sira liu-liu lider organizasaun rezistensia tenki hamutuk para ba oin bele koalia ho ministeriu edukasaun para tama iha eskola sira hodi koalia kona-ba istória kona-ba partisipasaun juventude ba libertasaun patria ne’e.

 

“Akontesimentu Massakre 12 de Novembru 1991 hanesan akumulasaun ida hosi prosesu tomak ne’ebé maka joven sira organiza. Ida ne’e maka ita dehan joven sira sai forsa libertasaun ba patria no jovens sai xave ba dezenvolvimentu kontinua bele sai hanesan fator determinante ida ka forsa bo’ot ida wainhira ita jere forsa ne’e ho diak sei sai xave ba dezenvolvimentu,” Manetelu hatete.

 

Padre Paroku Igreja Motael, David Alves hatutan juventude sira uluk ho sira nia mentalidade, karakter, sira nia personalidade no sira nia prinsipiu luta iha sira nia kakutak ho segredu bo’ot ida, agora joven sira sai hanesan xave ba dezenvolvimentu presiza iha kualidade, personalidade, prinsipiu, karakter no tenki forte iha nia misaun. Joven labele tuir de’it influensia, modernizasaun, situasaun maibé nia mak lori situasaun, nia maka determina.

 

Nia hatutan, joven sai xave tenki sai xave iha uma laran nia tenki muda nia hahalok respeita inan aman, familia, viziñu hodi evita hahalok ne’ebé maka ladiak. Nia dehan, jovem maka sai xave atu loke ema nia neon, atu loke ema nia laran, no joven tenki hatudu dalan diak katak dezenvolvimentu la’o hadia hahalok sira.

 

“Se jovem sira ne’ebé maka ita rona iha fatin-fatin oho malu, tuda malu, baku malu ne’e, jovem ne’ebé maka lakohi kontribui ba dezenvolvimentu maibé impede dezenvolvimentu. Juventude Lorico Aswain 12 de Novembru liberta ona patria, jovem agora tenki luta nafatin atu lori sira nia prinsipiu luta, politika, domin ba rai ne’e duni. Imi jovem mak bele muda Timor, imi rasik mak sei dezenvolve Timor no imi maka esperansa ba nasaun nian,” nia dehan.

 

Amo paroku Motael ne’e hatutan, uluk sira nia saskrifisiu luta mak ita hetan autodeterminasaun katak ita hetan liberdade no hadook-án hosi hahalok át sira hosi inimigu, maibéjoven agora presiza kontribui ba iha prosesu dezenvolvimentu tanba tempu luta ba libertasaun hotu ona agora ita luta hodi liberta ba povu nia moris diak.

 

Juventude luta hodi liberta povu nia moris diak, tuir Deputadu Bankada Fretilin, Inacio Moreira katak juventude maka sai forsa libertasaun ba iha vida sosial ne’e maka presiza prepara-án, kapasita-án, no tenki ho maneiras hotu-hotu esforsa-án ho sakrifisiu oinsa, sira bele kontribui hodi bele dezenvolve nasaun ida ne’e hosi aspeitu vida sosial no oinsa sira bele organiza-án hodi dezenvolve ekonomia nasaun Timor-Leste.

 

“Jovem labele hanoin de’it estadu atu foóbuat ruma maibé saida maka jovem sira atu fó ba nasaun tanba jovem tenki badinas buka maneiras hotu-hotu hodi kontribui ba dezenvolvimentu sosial ne’ebé mak iha. Klaru katak juventude sira sai xave ba dezenvolvimentu tanba juventude rasik maka iha forsa hodi kontribui ba dezenvolvimentu. Juventude uluk no juventude agora presiza kaer metin nafatin prinsipu tanba ita liberta ona patria entau agora ita presiza liberta povu hosi mukit (kiak),” Inacio Moreira tatoli. (Zezito da Silva)

 

SAPO TL ho Jornal Matadalan

link do postPor sapotl às 22:40, às 22:40  comentar

 
mais sobre mim
Novembro 2014
D
S
T
Q
Q
S
S

1

2
3
4
5
6
7
8

9
13
15

16
17
18
19
20
21
22

23
24
25
26
27
28
29

30


arquivos
2017

2016

2015

2014