9.11.15

Primeiru ministru, Rui Maria de Araújo ohin haktuir hikas kona-ba papel “inspiradór” hosi foin-sa’e hirak ne’ebé iha tinan 40 liu ba lidera ona movimentu ba libertasaun nasaun luzófona nian sira, no hatutan tan katak hafoin patria, agora falta maka liberta povu.


@Gabinete Primeiru Ministru

 

Rui Araújo – ne’ebé ko’alia lia hirak ne’e iha Dili, durante abertura ba Fórum Juventude hosi Komunidade Nasaun Lian Portugés (CPLP) – haktuir kona-ba papel hosi joven transformadór sira, hodi ko’alia hikas kona-ba ninia importánsia ba movimentu hirak ne’ebé hala’o iha Portugal, Áfrika ho Timor-Leste.

 

Haktuir hikas katak, ida ne’e nu’udar movimentu mudansa, ne’ebé ho “inisiativa hosi foin-sa’e ho tinan 20-30, hanesan Amílcar Cabral, Agostinho Neto, Samora Machel, joven kapitaun hosi 25-abril no Nicolau Lobato" hosi sira seluk.

 

 “Joven sira ne’e maka iha tempu ne’ebá sente atu halo barak liu tan no di’ak liu ba sira-ninia nasaun, foin-sa’e hirak ne’ebé labaruk no ko’alia atu ema bele rona sira-ninia hanoin hirak ne’ebé bele muda nomós transforma ona populasaun ninia moris, la’os de’it iha tempu ne’ebá, maibé durante futuru tomak”, dehan.

 

Joven líder hirak ne’ebé inspira, halo parte maka’as ba iha komunidade nia moris, “ho reivindikasaun ho kontestasaun” ne’ebé fó “kontributu bot ba libertasaun” hosi nasaun hirak ne’ebé komemora ona tinan independénsia ba dalahaat.

 

 “Buat hirak ne’e hanesan movimentu ne’ebé ho valór emansipasaun hodi muda ita-rain ho reperkusaun tuir orden polítika rejionál nomós globál”, dehan.

 

 “Agora, husik patria hosi jerasaun joven uluk nian, hanesan tarefa ba jerasaun foun sira hodi liberta povu”, tenik Rui Araújo, hodi fó hanoin hikas ba esforsu hirak ne’ebé presija, liu-liu ba foin-sa’e sira hodi kumpri objetivu dezenvolvimentu nian.

 

"Bazeia ba ita-nia inisiativa hodi kria meta, estratéjia no dalan ne’ebé realmente fó impaktu ba iha dezigualidade sosiál, luta kontra pobreza no injustisa, proteje ambiente no promove dame", dehan.

 

"Juventude luzófona iha papel ida ne’ebé bot liu hanesan paradigm ba transformasaun globál, hanesan ba iha konstrusaun nomós dezenvolvimentu sustentável ida hosi ita-ninia komunidade, ita ninia nasaun nomós ba iha nível globál", dehan, hodi hatudu ba “jerasaun Z”, ne’ebé moris hosi tinan 1990.

 

Dehan katak, papel joven nian mos bele sai nu’udar inisiativa ida ne’ebé polítika liu, hanesan Parlamentu Juventude ne’ebé ezisti ona iha nasaun luzófona oioin (Brazil, Mosambike, Portugal ho Timor-Leste) ka ba iha atividade ekonómika, hanesan setór agríkola.

 

 “Ami haree joven barak maka dedika-aan ba kultura ne’ebé sai nu’udar produtu la’os ba de’it subsisténsia hanesan ba ekonomia”, dehan hodi hatutan tan katak projetu hanesan Brigadas Juvenis maka “sei motiva foin-sa’e sira ba dezenvolvimentu”.

 

Proteje ambiente, empreendedorismu no voluntarismu ho koperativa foin-sa’e nian mos sai hanesan atividade seluk ne’ebé jerasaun foun sira sei halo.

 

Fórum Juventude – ne’ebé delegadu hosi nasaun CPLP hitu (laiha maka hosi Mosambike ho Guiné Kuatoriál) – sei hala’o to’o kinta-feira ho ajenda oioin, inklui semináriu ba loron ohin, ho tema joven maka hanesan “paradigm foun ba transformasaun globál”.

 

CPLP no globalizasaun, edukasaun no dezafiu hosi globalizasaun, joven no emprendedorismu, identidade kulturál vs globalizasaun nomós papel feto nian maka sei sai hanesan tema ba debate durante semináriu ne’ebé hala’o ohin, hafoin hala’o tiha iha 2009 liu ba.

 

Delegasaun hosi reprezentante asosiasaun joven nian hosi Estadu luzófona sia, to’o ona Dili, findesemana ne’e, no hala’o ona mos vizita bá Ataúro.

 

Timor-Leste foin maka hala’o reuniaun juventude CPLP nian ne’ebé organiza hosi Konsellu Nasionál Juventude Timor-Leste (CNJTL), liu hosi atividade oioin.

 

Aban, sei hala’o Asembleia Jerál FJ hosi CPLP nomós Asembleia Jerál Ordinária hodi debate kona-ba Deklarasaun Dili, no iha fali kuarta-feira maka sei halo vizita oioin, hanesan bá Prezidénsia, Palásiu Governu, Parlamentu, Eskola Portugeza Ruy Cinatti nomós bá iha Arkivu no Muzeu Rezisténsia Timor-oan nian.

 

Iha kinta-feira, hanesan aniversáriu 24.º hosi masakre 1991 nian maka sei hala’o marsa hosi Igreja Motael bá to’o Rate Santa Cruz, sei lee no asina Deklarasaun Dili, inklui halo komemorasaun kulturál ba Loron Nasionál Juventude.

 

SAPO TL ho Lusa

link do postPor sapotl às 05:41, às 05:41  comentar

 
mais sobre mim
Novembro 2015
D
S
T
Q
Q
S
S

1
2
3
4
5
6
7

8
9
10
13
14

15
16
17
18
19
20
21

22
23
24
25
26
27
28

29
30


arquivos
2017

2016

2015

2014