13.11.17

Iha loron-domingu ne'e, Prezidente timoroan halo homenajen ba "joven sira korajen nian" ne'ebé luta ona hasoru okupasaun indonéziu iha Timor-Leste, evoka vítima sira hosi masakre sira Santa Cruz nian, iha tinan 1991, no apela ba "hakmate no espíritu dame nian" iha momentu polítiku atual. 

 

Foto@ António Dasiparu /EPA


"Hodi dezenvolve nasaun ita presiza hakmatek no espíritu dame nian. Diferensa polítika sira hanesan natural iha demokrasia. Hanesan natural mosu diferensa sira iha programa sira, iha asaun sira ka opiniaun sira entre ema sira ka entre grupu sira", Francisco Guterres Lu-Olo hatete iha diskursu ne'ebé halo iha rate boot liu iha sidade Díli nian.

 

"Nu'udar Prezidente Repúblika ha'u apela ba diálogu, ba moderasaun iha diskursu sira ba ba respeitu ba dignidade hosi ema tomak nian. Dezenvolvimentu, kriasaun ba empregu, preparasaun hosi joven sira ba futuru presiza ambiente estável ida ne'ebé permiti implementasaun hosi polítika estável sira, iha área tomak", nia insisti.

 

Francisco Guterres Lu-Olo ko'alia iha serimónia ida hodi hanoin hikas masakre Santa Cruz ne'ebé akontese iha tinan 26 liubá, akontesimentu ne'ebé, filma hosi jornalista Max Stahl, fó koñese ba mundu drama ne'ebé maka populasaun hasoru ho okupasaun indonéziu iha Timor-Leste.

 

Intervensaun akontese iha momentu ida tensaun polítika iha Timor-Leste ho Governu minoritáriu, ne'ebé simu pose iha loron 15 Setembru, lidera hosi Fretilin, bele tuun bainhira opozisaun xumba ba dala rua programa hosi ezekutivu.

"Diferensa polítika sira labele hapara dezenvolvimentu nasional. Ne'e presiza komprensa hosi ema tomak hodi defende interese nasional sira - interese hosi ema tomak nian", xefe Estadu hatutan.

 

"Ha'u apela ba reforsu dame no estabilidade nian, no ha'u fiar iha imi nia maturidade polítika kresente. Ho de'it dame no estabilidade maka permiti ita rezolve problema sira juventude nian no nasaun nian. Ne'e maka heransa ne'ebé ita simu hosi raan sira ne'ebé joven sira fakar iha loron 12 Novembru 1991: konsolidasaun hosi espíritu nasionalista ho hosi unidade nasional nian", nia hatutan.

 

Grupu ida halibur hamutuk iha loron-domingu ne'e iha rate hodi hanoin hikas momentu ida ne'ebé importante tebes iha tinan ikus sira hosi luta hasoru okupasaun indonéziu.

 

Iha loron 12 Novembru 1991 hala'o misa ida no serimónia homenajen ida ba Sebastião Gomes, mate hosi elementu sira ne'ebé iha ligasaun ho forsa indonéziu sira loron balun antes iha bairu Motael, no ema rihun resin diriji to'o iha rate Santa Cruz.

Durante la'o sira loke kartaz sira protestu nian. Forsa indonéziu sira hatán ho violénsia maka'as, oho ema liu na'in 250 resin.

 

Imajen sira hosi masakre Santa Cruz, hasai hosi jornalista inglés Max Stahl no ne'ebé, ba ema barak marka ona momentu ida virajen nian iha kestaun Timor-Leste nian, sai hosi Díli liutiha loron hafoin masakre, iha loron 14 Novembru 1991, tanba intervensaun hosi holandeza Saskia Kouwenberg, ne'ebé subar kasete ne'e iha "bolsa" ida improvizadu entre kuekas rua ne'ebé suku hamutuk, iha istória ida ne'ebé nia konta ba ajénsia Lusa.

 

Iha nia diskursu, xefe Estadu fó ona homenajen ba "movimentu sira hosi joven sira korajen nian hasoru okupasaun no violénsia ba dignidade povu nian", ba "jornalista sira no belun sira ho korajen", hanesan Max Stahl, Allan Nairn, Amy Goodman ho Saskia Kouwenberg ne'ebé "haree ona no fó sai ona akontesimentu sira iha estranjeiru".

 

"Ha'u felisita memória hosi joven mártir sira ho asuwa'in hosi Santa Cruz ne'ebé fó aan ba mate no ba sira ne'ebé maka fó sira nia moris iha momentu sira seluk hosi ita nia prosesu luta ba independénsia nian", nia hatete.

 

"Ha'u felisita no habelar ha'u nia sentimentu profundu ba família tomak ne'ebé iha lutu nia laran, ne'ebé lakon oan-mane no oan-feto sira iha luta hodi defende dignidade povu nian no independénsia hosi ita nia rain, iha Santa Cruz no iha fatin sira seluk", nia afirma.

 

Lu-Olo konsidera "dame ho indepenénsia hanesan rikusoin boot" ne'ebé nasaun simu ho luta hasoru okupasaun, no hanesan importante pasa ba jerasaun sira iha futuru respeitu ba dignidade hosi ema timoroan tomak nian inklui joven sira".

 

"Iha tempu masakre Santa Cruz nian, luta hodi hadi'a kondisaun sira moris nian signifika luta ba liberdade no independénsia", nia konsidera.

 

"Agora, restaura ona independénsia, luta hodi hadi'a kondisaun sira moris nian signifika hametin dame hodi kontinua dezenvolve ita nia nasaun no ita nia kondisaun sira moris nian, no fó moris di'ak sira ba ita nia oan sira no ita nia bei-oan sira", nia hatutan mós.

 

Iha diskursu, xefe Estadu fó hanoin hikas importánsia hodi "fó atensaun máximu ba kestaun sira juventude nian", ho renovadu aposta sira iha edukasaun, formasaun profisional, kriasaun empregu nian no hadi'a kondisaun sira moris nian.

 

"Timor-Leste presiza joven sira ne'ebé preparadu hodi hatán ba nesesidade sira hosi dezenvolvimentu agrikultura nian iha nasaun tomak. Presiza mós empreza sira ho susesu, liuliu iha área turizmu, ne'ebé iha potensial maka'as hosi aumentu iha tinan hirak tuirmai", nia hatete.

 

ho Lusa

link do postPor sapotl às 13:33, às 13:33  comentar

 
mais sobre mim
Novembro 2017
D
S
T
Q
Q
S
S

1
2
3
4

5
6
7
8
9
10
11

12
14
15
16
17
18

19
20
21
22
23
24
25

26
27
28
29
30


arquivos
2017

2016

2015

2014